Maafisa wa polisi wa Kituo cha Polisi cha Narok wamewakamata washukiwa watatu wanaohusishwa na visa vya wizi wa kimabavu mjini humo na maeneo jirani.
Kukamatwa kwao kulifuatia simu ya dharura kuhusu tukio la wizi lililokuwa linaendelea katika eneo la Total. Polisi walipofika kwa haraka, waligundua kuwa genge la wanaume watatu lilivamia jengo la wapangaji na kuwapora mali kama simu za rununu, tarakilishi, na mitungi ya gesi. Katika vurugu hizo, mwanafunzi wa mwaka wa tatu wa Chuo Kikuu cha Maasai Mara alijeruhiwa vibaya.
Kulingana na Idara ya Upelelezi DCI, waliokamatwa ni Gideon Kipkorir Rono (22), Haron Kipkirui Bii (25), na Nicholas Kipngetich Bii (32). Walikamatwa wakiwa na mishale mitatu, kompyuta mpakato mbili, simu saba za mkononi, na mtungi wa gesi wa kilo 6.
Washukiwa waliwaongoza polisi hadi nyumbani kwao, ambapo mali nyingine zinazoaminika kuwa za wizi zilipatikana, vikiwamo vifaa vya kielektroniki, mitungi ya gesi, na mita za Kenya Power. Baadhi ya mali hizo tayari zimekabidhiwa kwa wamiliki halali.
Mwanafunzi aliyejeruhiwa anatibiwa katika kliniki ya Chuo Kikuu cha Maasai Mara na hali yake inaendelea kuimarika.
Washukiwa wanazuiliwa na wanaendelea kuhojiwa wakisubiri kufikishwa mahakamani, huku mali zilizookolewa zikihifadhiwa na zitatumika kama ushahidi.
